പ്യോങ്യാങ്/വാഷിങ്ടൺ: പശ്ചിമേഷ്യയിൽ ഇറാൻ-ഇസ്രയേൽ സംഘർഷം ആഗോള പ്രതിസന്ധിയായി മാറുന്നു. ഇറാന്റെ പുതിയ പരമോന്നത നേതാവായി മുജ്തബ ഖമനയിയെ തിരഞ്ഞെടുത്തതിനെ പിന്തുണച്ച് ഉത്തരകൊറിയ രംഗത്തെത്തി.
ഇസ്രയേലും യുഎസും ഇറാനിൽ നടത്തുന്ന ആക്രമണങ്ങളെ അപലപിച്ച കിം ജോങ് ഉൻ, ഇതിന് പിന്നാലെ ‘ചോയ് ഹ്യോൺ’ യുദ്ധക്കപ്പലിൽ നിന്ന് അതിശക്തമായ ക്രൂസ് മിസൈലുകൾ വിക്ഷേപിച്ച് കരുത്ത് കാട്ടി.
ഹോർമുസ് കടലിടുക്കിൽ അമേരിക്കൻ പ്രത്യാക്രമണം
ഹോർമുസ് കടലിടുക്കിൽ മൈനുകൾ നിക്ഷേപിക്കാൻ ശ്രമിച്ച ഇറാന്റെ 16 കപ്പലുകൾ തകർത്തതായി അമേരിക്ക അറിയിച്ചു. തകർത്ത കപ്പലുകളുടെ ദൃശ്യങ്ങൾ യുഎസ് സൈന്യം പുറത്തുവിട്ടു. ഇറാനുമായുള്ള ഏറ്റുമുട്ടലിൽ ഇതുവരെ 150 യുഎസ് സൈനികർക്ക് പരുക്കേറ്റതായി റോയിട്ടേഴ്സ് റിപ്പോർട്ട് ചെയ്തു.
ഇതിൽ എട്ടുപേരുടെ നില ഗുരുതരമാണ്. ഇറാന്റെ സൈനികശേഷി ദുർബലപ്പെടുത്തുന്നതിൽ അമേരിക്കൻ സൈന്യം നിർണായക വിജയം നേടിയെന്നും ലക്ഷ്യങ്ങൾ ഉടൻ പൂർത്തിയാകുമെന്നും പെന്റഗൺ വ്യക്തമാക്കി.
റഷ്യൻ കോൺസുലേറ്റിന് നേരെ ആക്രമണം
അതിനിടെ, ഇറാനിലെ ഇസ്ഫഹാനിലുള്ള റഷ്യൻ കോൺസുലേറ്റിന് നേരെ ആക്രമണമുണ്ടായി. കെട്ടിടത്തിന് കേടുപാടുകൾ സംഭവിച്ചെങ്കിലും ആർക്കും പരുക്കേറ്റതായി റിപ്പോർട്ടില്ല. ഇത് രാജ്യാന്തര നിയമങ്ങളുടെ ലംഘനമാണെന്ന് റഷ്യൻ വിദേശകാര്യമന്ത്രാലയം പ്രതികരിച്ചു.
ഇന്ത്യയുടെ ഇടപെടൽ; ജയശങ്കർ ഇറാൻ വിദേശകാര്യമന്ത്രിയുമായി സംസാരിച്ചു
സംഘർഷം ലഘൂകരിക്കാൻ ഇന്ത്യ നയതന്ത്ര നീക്കങ്ങൾ സജീവമാക്കി. ഇന്ത്യൻ വിദേശകാര്യമന്ത്രി എസ്. ജയശങ്കർ ഇറാൻ വിദേശകാര്യമന്ത്രി അബ്ബാസ് അരാഗ്ചിയുമായി ഫോണിൽ സംസാരിച്ചു.
നിലവിലെ സാഹചര്യങ്ങളെക്കുറിച്ച് ഇരുവരും വിശദമായ ചർച്ച നടത്തി. തുർക്കി ഉൾപ്പെടെയുള്ള മറ്റു രാഷ്ട്രങ്ങളും ഇറാനുമായി ചർച്ചകൾ നടത്തുന്നുണ്ട്. ആക്രമണം അവസാനിപ്പിച്ച് ചർച്ചകളിലേക്ക് മടങ്ങാനാണ് തുർക്കി ആവശ്യപ്പെട്ടത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
